Шотландын Ланаркшир мужийн нэгэн оршин суугч криптовалютын луйврын хохирогч болж 150,000 фунт стерлингийн (бараг 190,000 доллар) өртэй үлджээ. Тэрээр одоо нэмэлт санхүүгийн асуудлаас зайлсхийхийн тулд байшингаа зарахаас өөр аргагүй болсон байна.
Хохирогч Женнифер Facebook дээр зөвлөгөө өгөх мэргэжилтэн Мартин Льюисын оруулсан эргэлзээтэй зарыг хараад мөнгөө крипто схемд оруулахаар шийджээ.
Уг Их Британийн сэтгүүлч бол мөнгө хэмнэх аргуудын талаар зөвлөгөө
өгдөг вэб сайтыг бүтээгч юм. Өмнө
нь түүний дүр төрхийг ашигласан луйварчид их хэмжээний залилан хийж байсан. Энэ удаагийнх ч бас үүний нэг байсан юм.
Гэсэн хэдий ч Женнифер төслийн хууль ёсных гэдэгт итгэж, оны эхэнд Revolut-ээр дамжуулан бараг 190,000 доллар оруулсан. Арав хоног дараалан хөрөнгө оруулсны дараа түүний банк зарим шилжүүлгийг хааж эхэлснээр ямар нэг зүйл буруу болж эхэлснийг анзаарчээ.
Женнифер крипто луйварчдын сүлжээнд орсон гэдгээ үүний дараа мэдээд сэтгэл санаагаар унасан байна. Тэрээр мөн түүний өрийн үлдэгдэл маш өндөр байгаа тул цаашид санхүүгийн асуудлаас зайлсхийхийн тулд байшингаа зарах шаардлагатай болсон гэдгээ дурьдаад “Би амьдралдаа хэзээ ч өр тавьж үзээгүй, амьдралдаа зээл авч байгаагүй, зээлийн картын төлбөр ч байгаагүй. Надад тохиолдсон зүйлд би үнэхээр итгэж чадахгүй байна, энэ үнэхээр аймшигтай. Би одоо байгаа газартаа хүрэхийн тулд маш их цаг зарцуулсан бөгөөд энэ байшингаа алдах нь мэдээжийн хэрэг аймшигтай байна" гэжээ.
Шотландын оршин суугч өөрийгөө крипто зах зээлийн талаар "нимгэн мэдлэгтэй" байсны улмаас гэмт хэрэгтнүүдийн хамгийн тохиромжтой бай болсон гэж үзэж байна.
Харамсалтай нь орон нутгийн цагдаа болон Advice Direct Scotland ТББ түүний хэргийг залилан гэж ангилсан тул алдсан мөнгөө буцааж авч чадсангүй.
Тэрээр мөн өөр хүний дүрд хувирсан крипто схемд хэзээ ч хөрөнгө оруулахгүй байхыг хүмүүст анхааруулав.
