Хойд Солонгосын алдартай хакерын бүлэг болох Лазарус групп нь Harmony
криптовалют протоколд халдсан байх боломжтой гэдгийг шинжээчид тогтоожээ. Гэмт
хэргийн байгууллага сүүлийн жилүүдэд үүнтэй төстэй хулгайн гэмт хэрэгт олон
удаа оролцож байсан.
Лазарус бүлгийн дараагийн хохирогч
Өнгөрсөн долоо хоногт хакерууд Harmony Horizon Bridge-ийг зөрчиж,
ойролцоогоор 100 сая долларын үнэ бүхий Ethereum-ийг хулгайлсан. Хэсэг
хугацааны дараа Хармонигийн баг халдлага үйлдсэн гэмт хэрэгтнүүдийг хайж
олохоор эрэн сурвалжлага өргөн хүрээнд хийж эхэлсэн.
Хулгайлагдсан дижитал хөрөнгийг хянадаг фирм болох Elliptic Enterprises-ийн
мэдээлснээр, дээрх хакер халдлагыг Лазарус групп (Хойд Солонгосын төрийн
дэмжлэгтэй кибер гэмт хэргийн байгууллага) хийсэн байх магадлалтай. Тус
компанийн мэдээлснээр, угаах аргууд нь хакеруудын өмнө нь хэрэглэж байсан
маневруудтай маш төстэй байсан гэдгийг онцолжээ.
Үүнээс гадна Elliptic Enterprises хулгайн гэмт хэрэг хэрхэн явагдсан талаар
дэлгэрэнгүй тайлбарлав. Лазарус групп протоколын аюулгүй байдлын системийг
зөрчихийн тулд Ази Номхон далайн бүс нутаг дахь Harmony-ийн ажилчдын
хэрэглэгчийн нэр, нууц үгийг онилсон. Гэмт этгээдүүд хяналтаа тогтоосныхоо
дараа хулгайлсан эд хөрөнгийг шөнийн цагаар зөөвөрлөсөн ба хулгайлсан 100 сая
долларын 40 гаруй хувийг Tornado Cash холигч руу шилжүүлсэн байна.
Coincub-ийн саяхан хийсэн судалгаагаар Хойд Солонгос нь криптовалютын гэмт
хэргээрээ тэргүүлэгч улс гэж тооцоолжээ. Олон жилийн турш тоталитар улс орны
чадварлаг хакерууд дэлхийн засгийн газар болон хувийн компаниудыг онилж,
2017-2022 оны хооронд 1.5 тэрбум долларын дижитал хөрөнгийг хулгайлсан байна.
