Алдартай NFT цуглуулга Bored Ape Yacht Club (BAYC) төслийн бүтээгч Юга лаборатори болон бусад 29 компанийг NFT-ийн үнэ унасаар байгаа тул төөрөгдүүлэн сурталчилсан хэргээр шүүхэд нэхэмжлэл гаргажээ.
CNN-ийн мэдээлснээр, шүүхэд дуудагдсан бусад хариуцагчдад урлагийн дуудлага худалдааны корпораци Sotheby's Holdings, спортын хувцасны аварга Adidas, крипто төлбөр тооцооны MoonPay фирм, Канадын дуучин Жастин Бибер, Парис Хилтон зэрэг алдартнууд багтсан.
Нэхэмжлэгч нар Sotheby's-ийг BAYC NFT-ийн үнийг зохиомлоор өсгөхийн тулд Юга лабораторитой нийлж байгаад буруутгасан. Тэд Sotheby's 2021 онд 100 цуглуулгын 1 бүтээлийг нэг худалдан авагчид 24 сая гаруй доллараар худалдсан нь хууран мэхлэлт гэж тайлбарлаж, Yuga Labs хөрөнгө оруулагчдын цуглуулгыг сонирхох сонирхлыг нэмэгдүүлэхийн тулд ийнхүү зохиомол шуугиан дэгдээсэн гэж үзэж байна.
Харин Бибер, Хилтон нарыг төслөөс авсан санхүүгийн ашиг тусаа илчлэхгүйгээр BAYC-ийг сурталчилсан гэж буруутгасан.
MoonPay болон Adidas-ийг мөн NFT-ийн үнийг зохиомлоор өсгөхөөр хуйвалдсан гэж үзэж байна.
Эдгээр нэхэмжлэлийн хариуд Yuga Labs-ийн хэвлэлийн төлөөлөгч энэ буруутгалыг "үндсэн болон бодит үндэслэлгүй" гэж мэдэгдэв.
Sotheby's шүүхэд гаргасан мэдэгдлийг үндэслэлгүй гэж үзээд шүүхээр өөрийгөө хамгаалахад бэлэн байгаагаа мэдэгдэв.
Нэхэмжлэгч нар уг хэргийг тангарагтны шүүхээр хэлэлцүүлж, 5 сая гаруй долларын нөхөн төлбөр авахыг хүсч байна.
Нэмж дурьдахад, 2021 онд дээд цэгтээ хүрч байсан BAYC NFT-ийн үнэ өнгөрсөн онд мэдэгдэхүйц буурсан. Өнөөдөр цуглуулгын доод үнэ нь 25 ETH (42,700 доллар) байсан нь нэг жилийн өмнөхөөс 66%-иар буурсан үзүүлэлт юм.
